PANTUN RAYER OGHANG N9

*** Den banggo jadi oghang N9... jadi den kobarkan pantun N9 sempona nak RAYER.


Adopun awal tatkalo maso dulu
Naik di ateh bukit bintang penjaring
Berkecalang pelantak bosi
Kemuntong membilang tungku
Penyongek di ateh
Timbal jalan simpang ompek
Selilit Pulau Perca
Selembang Tanah Melayu
Se alam Minangkabau
Se alam juo yang terbuko
Air segantang selubok
Selonyap bunyi malam

Kok gagak dah jadi hitam
Kok bangau dah jadi putih
Adat tak lapuk dek hujan
Tak lokang dek paneh
Tak kuning dek kunyit
Tak lomak dek santan
Tak haus dek maso
Kok dibasuh berhabis air
kok dikikis berhabis bosi
Adat putih bak kapeh
Hukum lombut bak air
Kok panjang dikorek
Kok bocor ditampal
Kok tiris dibotul
Kok tojun dari langit
Samo-samo kita tampung
Kok memancut dari bumi
Samo-samo kito pijakkan
Kok datang dari dopan
Samo-samo kito hadang
Kok datang dari bolakang
Samo-samo kito hambek
Sebukit samo didaki
Selurah samo kito turuni
Ke laut samo kito ronangi

Penakik pisau seraut
Ambil galah batang lentubung
Seludang jadikan nyiru
Nan setitik jadikan laut
Nan sekopal jadikan gunung
Alam terkombang jadikan guru
Kok nak tahu tingginya gunung
Tanyo pado onggang
Kok nak tahu dalamnya lubok
Tanyo pado memorang
Kok nak tahu lebarnya pantai
Tanyo pado seluang
Kok nak tahu tobalnya hutan
Tanyo pado pak bolang
Kok nak tahu lebarnyo padang
Tanyo pado belalang
Kok nak tahu hebatnyo adat?
Totak buluh dipilih-pilih
Buluh ditarik jangan songsang

Sungguh hebat adat perpatih
Bagai bulan dipagar bintang
Walaupun rumput mati terlapah
Akarnyo tidak mahu tonggolam
Walaupun laut menjadi marah
Semangat beradat janganlah padam

Kalau mencari pokok berbuah
Pucuk lobek dahan berdaun
Kalau mencari bangso bertuah
Duduk beradat togak bersantun
Muko podang belakang podang
Podang berhulu gading gajah
Esa hilang duo terbilang
Pantang kito berpaling tadah

Kok laghi di kojar
Kok tongolam di solam
Kok borek samo samo dipiko
Kok lotih ditolak
Kok buto dipimpin
Kok lumpuh dipiko
Kok hilang dicaghi

Seuntai kasih sejambak salam
Doghub jantung menghisik ghaso

Selamat menyambut Idul Fitri, minal aidzin wafa idzin.
Maap zahir & batin diateh segalo salah dan silap
daghipado warga N9 kek serato dunio yoooo....